چوخورلار

هاردان و نئجه باشلاماغا دوشونمورم. آخی بو بیر حیکایه یوخ بلکه بیر جور دردوتلاشماقدی. آمما نئجه ائله­ییم کی سیز بو سطیرلرین کیمه عایید اولدوغونو تانیمیرسیز، آمما ایستر ایستمز بونون اوخوماغینین مجبوریتینده­سیز (شاعیر دئمیشکن سانا مجبورام!!!). من کامپیوتریمین اؤنونده بیر به بیر کی­بوردون دویمه­لرینی آختاراراق کلمه­لری سیزه تایپ ائدیرم. اوتورموشام و بو طرفیمده ده -سول طرفیمده- (آخی من بیر آز سولچویام!) بیر ایستکان دملنمیش احمد چایی وار) بلکه سیز ده اوتوردوغونوز یئرده یوخسا آیاق اوسته (چوخ دا فرق ائتمز؛ یعنی اولا بیلر کی شبکه­ی اوستانینین رژیمی سریال­لارینا باخا-باخا) بو یازینی اوخویورسوز. یادیمدان چیخمامیش دئییم بو گون خوردادین بیریدیر، (من اولسام خورداد یئرینه قان آیی ایشله­درم) هله موبایلیمدا اوخونمامیش بیر مئساژ وار، «دیرچه­لیش بایرامینیز قوتلو اولسون!» یازیب.

رضا عبدی-نی بیر ایلدن آزدی کی تانیرام. دوشونجه­لی بیر جاوان و البته یازیچینین بیریسیدیر. (نه یاخشی شاعیر دئییل، شاعیرلره گؤره یازماق یامان چتین اولور، آخی بیر آز دلی سودولار! آدام نه­لرین یازسین؟)

بیزلر بیری اؤلنده، یا دا کی دیریلنده، (گاهدان دا توتولاندا!) اونون یادینا دوشریک. ریضا توتولوب و بللی دئییل هانسی هاردادی، هئچ اولماسا او شاعیر، او گؤی گؤزلو تانری 209-دا ایدی. آدی سانی وار ایدی اورانین، بیر ایکی یوز دوققوز دئییردین یوز، ایکی یوز دوققوز ائشیدیردین. آمما نه سن، نه ده من (بلکه قارداش­لارین بعضیسیندن ساوایی!) بیلمیریک رضا هاردادی.

گؤره­سن خبری وار بو گون شهرده هئچ خبر اولمادی؟ گؤره­سن بیلیر پولاتچیلار (همن گسترش فولاد) تبریزده اوتوزدولار و بیز آرزولاییریق تهران­ـدا شامپیون اولسونلار؟ گؤره­سن کاغیذ قلمی وار الینده بیر حیکایه (رضا سن آللاه شعر یازما!) یازسین بیزه؟ گؤره­سن یوخو گؤره بیلیر؟ آخی من چوخداندی یوخو گؤرنمیرم، چوخداندی یازا بیلنمیرم... (کاش قارداش­لارین بیری اونا دئسین کی من بیر ایلدن سونرا تکجه رضانین عشقینه یازا بیلمیشم).

نه اولاردی بیز هامیمیز بیرگه دوستاغا دوشوردوک، اوندا اوردا اوتوروب شعر گئجه­لری، حیکایه جلسه­لری، نه بیلیم بئله اوشاق اویونو دای... قوراردیق.

بیز ده اوردا چالیب اویناردیق دای، نه اولار کی آدام بؤیوک دوستاقدان بالاجاسینا گیرسین! (یادیندا اولسون اوردا هر نه­دن اؤنجه قاراباغ شیکسته­سینی اوخویاق، سونرا منیم او گؤی گؤزلو شاعیر دوستوم بیر شعر اوخوسون. ایجازه وئرسزسه من ده بیر کیچیک حیکایه اوخویارام- (آخی حیکایه یازاریمیز یامان آزدیر، اولوب قالان­لاری دا توتورلار!) سیزه ایتحاف ائدرم، سؤز وئریرم!)

بو یازی آمما رضا عبدی­ـه سونولور، بیر قوجاق دولوسو پارانتزلرله!!! (((((((((((((((((((())))))))))))))))))))

اتک یازی­لار

1- آی اوغلان منیم سلینجرلریمی وئر دا، آدام کیتابی اوخویاندان سونرا قایتارار، یئکه کیشیسن! (بو رضایا عاییددیر، سیزه ربطی یوخدور!)

2- بو یازینی دئدییم کیمی بیر جور دَنَمه سانیرام، بیر جور دردلشمک رضا قارداشیملا. اونا حیکایه کیمی باخمایین لوطفن!

3- رضادان شکیلیم یوخ ایدی، ویکتور خارانین شکیلینی اکله­دیم. نه ده اوخشاییرلار بیربیرلرینه.